Leylanı və qızını öldürən Fəridin məhkəməsində gözlənilməz qərar - FOTO

18.01.2024 19:13
262
65a9431b676a1202401242619

Qobu qəsəbəsində 20 yaşlı arvadı Leyla Hüseynlini və səkkiz aylıq körpəsi Aylanı amansızlıqla öldürməkdə ittiham olunan Fərid Hüseynlinin cinayət işi üzrə məhkəmə prosesi başlayıb.

Azsabah.comun məlumatına görə, Sumqayıt Ağır Cinayətlər Məhkəməsində keçirilən iclasda tərəflərin hüquqları izah edilib, ilkin dinləmələr keçirilib.

Müdafiə tərəfi indiki mərhələdə hər hansı vəsatətlə çıxış etməyib.

Zərərçəkmiş şəxsin hüquqi varisi qismində tanınmış atası isə hazırlıq iclasında iştirak etməyib. Onu məhkəmədə nümayəndəsi təmsil edib.

Hüquqi varisin nümayəndəsi məhkəmə istintaqının qapalı keçirilməsini xahiş edib. Zərərçəkmiş tərəf iş materiallarında olan epizodların vəsatətin təmin edilməsi üçün əsaslı olduğunu düşünür.

Hakimlər heyəti müşavirədən sonra məhkəmə istintaqının qapalı keçiriləcəyini elan ediblər.

İş üzrə ilk baxış iclası fevralın birinə təyin edilib.

    Qeyd edək ki, dəhşətli cinayət hadisəsi 2023-cü ilin iyununda Abşeron rayonu Qobu qəsəbəsində qeydə alınıb. İttihama görə, 30 yaşlı Fərid Hüseynli yaşadıqları evdə əvvəlcə 20 yaşlı arvadı Leyla və səkkiz aylıq körpəsi Aylanı bıçaqlayaraq öldürüb, daha sonra özünə bıçaqla xəsarət yetirib. Leyla Bakı Dövlət Universitetinin üçüncü kurs tələbəsi olub. O, Biologiya müəllimliyi ixtisası üzrə təhsil alırdı.

    F.Səfərliyə qarşı Cinayət Məcəlləsinin 120.2.4, 120.2.7 və 120.2.9-cu (xüsusi amansızlıqla və aşkar surətdə köməksiz vəziyyətdə olan iki şəxsi öldürmə) maddələri ilə ittiham verilib. O, bu maddələrlə təqsirli bilinərsə, 14 ildən 20 ilə və ya ömürlük azadlıqdan məhrum edilə bilər.